廿幾年前的某一天 (轉載)

早一兩年在網上見到這段文字 , 當閱讀每一字一句時 , 就好像入了時光機一樣 , 看完才知雙眼已泛淚光 , 深深給其打動了潛在的情懷 , 當時祗save低了內文但作者是誰就真的沒記錄了 , 很想在此感謝此文的作者 , 具體地記敘了小弟或其他同年紀朋友的一些童年回憶 , 多謝 !!!

-----------------------------------------------------------------------

7:00am ~ 起身,用黑人牙膏(鐵皮包裝)刷牙;攞雪到硬過石嘅牛油搽生命麫包 (嗰時個招紙仲教埋麫包有咩食法,如用火腿夾,'查'花生醬,etc…圖文並茂 )


7:30am ~ 拎住個紅A膠書箱同畫板出門口返學. 著住對有啲黑mun mun 嘅白鞋, 長袖學校運動衫,再加橡筋短褲仔(無拉鍊).

7:45am ~ 見到阿明仔楂住本海豹叢書出版嘅新叮噹同漫畫週刊,同其他同學爭住一齊睇兼吹吓水…

8:00am ~ 擾攘一輪,喺操場排隊,因為太嘈,俾當值老師勁炳,話要全場靜哂先俾上課室 ….仲拉咗幾個滋事份子出嚟罰企,祭一祭旗.

8:05am ~ 12:30pm 喺課室俾班主任點名. 之後開始上課.
中文 – 先謄文,上次篇作文太多錯,改番正先. 之後作文,題目係 '中秋節'
英文 – 默書, 分seen dictation 同 unseen dictation默生字 ….unseen 好難呀,我見到隔離呀小柱將'enough' 寫做'in love'…嘻嘻….之後 miss 教第三身單數,邊個要喺動詞加s, es, 定唔加….
數學 - 教單利息. 下堂教複利息
社會 – 教'香港的交通工具',老師問:'有邊幾樣呀',個個爭住舉手答 . 習作係喺報紙上搜集any交通工具照片.
自然 – 教家禽…跟住老師讀:'牛耕田,馬拉車,羊兒剪毛叫咩咩 '
健教 - 睇ETV. 教'個人衞生的常識'.
勞作 – 教刻薯印. 下堂帶空蛋殼做復活蛋.
美術 – 以清潔運動為題,高分可以攞去貼堂威威不特止,仲可以出去參賽.
音樂 – 教唱'阿里山的姑娘'. 用牧童笛吹'小太陽'.
體育 – 排隊接力賽跑.嬴咗無獎,但係成班男女同學都好落力好踴躍,出盡力狂跑, 氣氛高漲.

9:45am & 11:10am ~ 放小息….個個趕住落去小食部買維他樽裝可樂,青檸,橙汁或忌廉 ,仲有維他奶,麥精…冬天有熱嘅供應. 飲完自行按樽….仲記得小食部個肥佬校工好鬼肥 ,個肚腩突哂出嚟,同韜韜有得揮….除咗飲嘢, 仲有玩吓猜皇帝,何媽… 隊吓劍仔,玩吓豹虎,交換吓貼紙同忍者小靈精咭…

12:45pm – 放學喇…喺屋企食碗'老媽子蛋炒飯',yummy….睇緊無記陳齊頌主持嘅'婦女生姿 '或者麗的嘅' 午間小敍'/'下午茶'

1:15pm – 開始做功課,攞個鐵筆盒/雙面膠筆盒出嚟先….寫習字(一篇大字 ,一篇小字..啲墨盒好臭呀),寫生字,寫copybook,做十題算術 ,做社會作業, 健教作業….用水彩同木顏色(lunar牌)畫埋幅畫先…填埋手冊就…….

2:15pm – 做哂功課lu!! 踢住膠拖,fing住個搖搖去'小童群抽會'/ 東華三院圖書館借圖書睇. 最鍾意去小童群抽會,因為有三個大書櫃擺哂啲兒童樂園呀,叮噹呀,Q太郎呀 ,老夫子呀啲公仔書,任摷!任睇,足可消磨成個鐘….嘆完公仔書之後'撩 '住牙去揀番幾本多字啲嘅圖書,如西遊記,亞里巴巴,格林童畫,再番屋企慢慢嘆 …嘻嘻

3:15pm – 撞見啲同學仔,扮吓街童,通街追,打打鬧鬧玩陣先,買吓零食 …美味米(有紅綠啡三種,不過分唔出有咩唔同),酸木瓜,唧唧冰,珍珍辣薯片 ,眼鏡朱古力,Apollo孖條,吉百利朱古力,魚蛋,乖乖(好多小玩具送),印水紙糖,珍寶珠…

4:00pm – 趕番屋企坐定定睇'大鐵人17號'/'飄零燕'/'雷鳥拯救隊 './'科學探險隊'

4:30pm – 繼續霸住個電視睇'醒目仔時間'(隻大熊貓毛毛好得意呀)/'430穿梭機' ( 梁朝偉,譚玉瑛好後生呀,區艷蓮好靚女呀..)/'跳飛機'(sunny哥哥又彈結嘞, 青蛙仔跟住唱啦…)……之後播'宇宙大帝','腦波子','電子神童',' 千年女巫'………

5:30pm – 借咗同學仔啲新印板,自己又跟住整番個先,要用界刀好小心好俾心機彫o架…. 又借咗同學仔本漫畫'南瓜酒'(鹹鹹哋咪俾亞媽知,嘻)同'電腦奇俠'睇…再玩陣又係借番嚟嘅扭計骰同扭計蛇 …….;都係唔好,畫興忽發, 揾幾頁上個學期用剩嘅數學格仔簿,畫吓啲超人,超時空要塞呀 ,自創隻高達先…

8:00pm – 冲完涼,等埋老豆放工食飯嘞. 正,今餐有楊協成咖哩雞…睇緊電視入面 '上海灘'/'山水有相逢'/'執到寶'/'流氓皇帝'/'天龍訣 '/'天蠶變'/'大地恩情'/'彩虹'送飯……食完飯睇埋'倚天屠蟲記'/'老洞'/'發現灣'/'四大名捕'/'陸小鳯'/'圓月彎刀'/'離別鈎'/'奮鬥'/'網中人'/'家變'/'上海灘'….

10:00pm – 雖然眼瞓,但都要睇埋歡樂今宵先…今晚又有鬼故睇,係'四人歸西 ',好驚呀~…

11:00pm – 俾老媽子迫上床瞓覺…..矇矓之際 …敝家火! 唔記得聽日中文背默,死嘞…


-----------------------------------------------------------------------------------------------------------